काठमाडौं – आज उपत्यकामा अधिकांश बीमा कम्पनीका कार्यालयहरु पनि बन्द भएका छन् । निषेधाज्ञाका क्रममा ट्राफिक प्रहरीले बीमा कम्पनीका कर्मचारीहरुलाई बाटोमै रोकेर दुःख दिएपछि बीमा कम्पनीहरु पनि बन्द भएका हुन् । ‘नजिकै बसोबास भएका कर्मचारीले कार्यालय खोलेका छन्, नत्र त ट्राफिकले सबैलाई बाटोमै रोकेर दुःख दिईरहेको छ, सके खोल्नुस्, नसके घरबाटै काम गर्नुस भनेका छौं’, जीवन बीमक संघका अध्यक्ष तथा सूर्या लाइफका प्रमुख कार्यकारी अधिकृत शिवनाथ पाण्डेले कर्पोरेट नेपालसँग भने । उता, निर्जीवन बीमा कम्पनीका सिइओहरुको संगठन नेपाल बीमक सं३का महासचिव तथा सगरमाथा इन्स्योरेन्स कम्पनीका प्रमुख कार्यकारी अधिकृत चङकी क्षेत्रीले पनि अधिकांश बीमा कम्पनीहरु बन्द रहेको बताए । ‘कार्यालय गएका अधिकांश साथीहरुलाई बाटोबाटै फर्काइएको छ, नजिकै भएकाहरुले कार्यालय खोल्नु भएको होला नत्र अधिकांश बन्द छन् ।

संघका महासचिव क्षेत्रीले भने बीमा कम्पनीहरुले अघिल्लो पटक लकडाउन जस्तै आवत जावतमा समस्या आउने सम्भावनालाई हेरेर घरबाटै काम गर्ने व्यवस्था मिलाईएको पनि क्षेत्रीले बताए । ‘पहिले जस्तै समस्या आउला भनेर हामीले घरबाटै काम गर्ने गरि ल्यापटप सहितका उपकरण उपलब्ध गराईसकेका थियौं, जसले सके उनीहरुले कार्यालय खोले, नसक्नेहरु बाटोबाटै फर्केर घरबाट काम गरिरहेका छन् क्षेत्रीले भने । बीमा समितिका कार्यकारी निर्देशक राजुरमण पौडेलले पनि ट्राफिक प्रहरीहरुले बाटोमा अवरोध गरिरहेको बताए ।