काठमाडौं । रिलायन्स लाइफ इन्स्योरेन्स कम्पनीको गत आवको चौथो त्रैमासमा नाफा ४८ प्रतिशत वृद्धि भएको छ । सो अवधिमा कम्पनीले रू. ४ करोड ३३ लाख नाफा कमाएको हो । अघिल्लो आवको चौथो त्रैमासमा कम्पनीको नाफा रू. २ करोड ९२ लाख थियो । कम्पनीले ६३ लाख कित्ता आईपीओ निष्कासन गर्नको लागि नियामक निकाय नेपाल धितोपत्र बोर्डबाट स्वीकृति पाएको छ । कम्पनीको विक्री प्रबन्धकमा सानिमा क्यापिटल लिमिटेड रहेको छ ।

 हाल कम्पनीको चुक्तापूँजी रू. १ अर्ब ४७ करोड रहेको छ । आईपीओ निष्कासन पछि उक्त पूँजी रू. २ अर्ब पुग्नेछ । गत आवको चौथो त्रैमासमा कम्पनीले जगेडा कोषमा रू. १४ करोड ३२ लाख सञ्चित गरेको छ भने जीवन बीमा कोषमा रू. १ अर्ब १४ करोड जम्मा भएको छ ।

कम्पनीले गत आवको चौथो त्रैमाससम्ममा रू. १ अर्ब ४१ करोड बीमाशुल्क आर्जन गरेको छ । अघिल्लो आवको यसै अवधिको तुलनामा बीमाशुल्क ८८ प्रतिशत वृद्धि भएको हो । सो अवधिमा कम्पनीले रू. ७५ करोड १७ लाख बीमाशुल्क आर्जन गरेको थियो । गत आवको चौथो त्रैमाससम्ममा कम्पनीले ३७ जनालाई रू. ७ करोड ३८ लाख दाबी भुक्तानी गरेको छ । कम्पनीको कुल जारी बीमालेखको संख्या १७ हजार ८८९ पुगेको छ । सोही अवधिमा कम्पनीले बीमालेखको धितोमा राखेर रू. ११ करोड ४२ लाख कर्जा प्रवाह गरेको छ ।

–––