काठमाडौं । गत साता अन्तिम दिन बिहीबारबाहेक सबै दिन सेयर बजार परिसूचक नेप्से बढेपछि ४२ धितोपत्रको मूल्य ५२ सातायताकै उच्च बिन्दुमा पुगेको नेप्सेको तथ्यांकले देखाएको छ । यी धितोपत्र वा इकाइको मूल्य उच्च मूल्यभन्दा न्यूनतम २ देखि अधिकतम १० प्रतिशतले मात्रै तल छ । अर्थात्, यी धितोपत्रको कारोबार गर्नुअघि ध्यान दिनुपर्ने देखिन्छ ।

वार्षिक उच्च बिन्दुनजिक आएका कम्पनीहरूको मूल्य त्यो तहबाट घट्न सक्ने विश्लेषण गरिन्छ । यद्यपि, सधैं यही नियम लागू हुन्छ र यसैलाई पालना गर्नुपर्छ भन्ने हुँदैन । सामान्य अवस्थामा कम्पनीको वस्तुगत अवस्थामा परिवर्तन नभए, बजार वृद्धिका अन्य कारणहरू नभएमा भने वर्षकै उच्च बिन्दुनजिक पुगेपछि मूल्य ओरालो लाग्न सक्छ । त्यसैले लगानी गर्दा यसमा ध्यान दिनु जरुरी हुन्छ ।

नेप्से परिसूचकमा लगातार वृद्धि हुँदा वा बजारअनुकूलका सूचना प्रवाह हुँदा प्रायः सबैजसो कम्पनीको मूल्यवृद्धि हुने प्रवृत्ति रहेको छ । केही समयअघिसम्म बजारमा यही प्रवृत्ति देखिएको पनि छ । त्यसैले यी पक्षलाई भने लगानीकर्ताले ध्यान दिन छुटाउनुहुँदैन ।

लक्ष्मी बैंक, ग्लोबल आइएमई समुन्नत योजना १, नेपाल इन्स्योरेन्स, हिमालयन जनरललगायतको मूल्य वर्षकै उच्च बिन्दुनजिक आएको हो । सामूहिक लगानी कोष र ऋणपत्रहरूको मूल्यमा समेत एक वर्षकै नजिक छ । तर, यिनीहरू अंकित मूल्य (सार्वजनिक निष्कासन गर्दाको मूल्य) नजिक छन् ।