काठमाडौं । नेपाल बंगलादेश बैंकले कोभिड–१९ को उपचारमा प्रयोग हुने जीवनरक्षक औषधि सहयोग गरेको छ । बैंकले नेपालमा अभाव भइरहेका वेला २ करोड २५ लाख रुपैयाँबराबरको रेनडेसेभिर औषधि सहयोग गरेको हो ।

आफ्नो संस्थागत सामाजिक उत्तरदायित्वलाई मनन गर्दै संयुक्त लगानीको बैंक आइएफआइसी बैंक, बंगलादेश तथा औषधि उत्पादक बेक्सिमको फर्मास्युटिकल, बंगलादेशको संयुक्त पहलमा ती औषधि सहयोग गरिएको बैंकले जनाएको छ । ५ हजार थान औषधि बिहीबार ढाकास्थित नेपाली राजदूत डा. वंशीधर मिश्रालाई हस्तान्तरण गरिएको जनाइएको छ ।

उक्त औषधि अबको एक–दुई दिनभित्रमा नेपाल आइसक्ने र सर्वसाधारण जनताको जीवनरक्षामा प्रयोग हुने आशा लिएको बैंकले जनाएको छ । बैंकले सामाजिक उत्तरदायित्वअन्तर्गत यसअघि पनि नेपाल सरकारको कोभिड–१९ फन्डमा १ करोड ४५ लाख रुपैयाँ प्रदान गरिसकेको जनाएको छ ।