नेपाल बैंक लिमिटेडले सरकारले स्थापना गरेको कोरोना संक्रमण रोकथाम, नियन्त्रण र उपचार कोषमा ३ करोड ४६ लाख रुपैयाँँ प्रदान गरेको छ । बैंकले मौद्रिक नीतिमा भएको व्यवस्था तथा नेपाल राष्ट्र बैंकबाट भएको निर्देशनअनुसार संस्थागत सामाजिक उत्तरदायित्व कोषमा मौज्दात रहेको रकम कोषमा जम्मा गरेको हो । सहयोग रकमको चेक बैंक सञ्चालक समितिका अध्यक्ष वासुदेव अधिकारीले अर्थमन्त्री डा. युवराज खतिवडालाई हस्तान्तरण गरेको बैंकले जनाएको छ । चेक हस्तान्तरण कार्यक्रममा अर्थमन्त्री खतिवडाले कोरोना संक्रमण रोकथाम र नियन्त्रण गर्ने नेपाल सरकारको प्रयासमा नेपाल बैंकले पु-याएको सहयोगका लागि धन्यवाद दिएका थिए ।

बैंक सञ्चालक समितिका अध्यक्ष अधिकारीले सरकारले चालेका कदमहरूमा बैंकको सदैव साथ रहने प्रतिबद्धता व्यक्त गरेका थिए । उनले कोरोना संक्रमण रोकथाम, नियन्त्रण र उपचारका लागि नेपाल बैंकले सबैभन्दा पहिला सहयोगको घोषणा गरेको र हालसम्म संघीय सरकारको कोषमा ४ करोड ४६ लाख रुपैयाँ र प्रदेश सरकारहरूलाई ५ लाख रुपैयाँका दरले ३५ लाख रुपैयाँ सहयोग प्रदान गरिसकेको जानकारी दिए । बैंकले जम्मा ४ करोड ८१ लाख रुपैयाँ हस्तान्तरण गरिसकेको उनको भनाइ थियो । कार्यक्रममा बैंकका प्रमुख कार्यकारी अधिकृत कृष्णबहादुर अधिकारीले मौद्रिक नीति र नेपाल राष्ट्र बैंकको निर्देशन पालना गर्दै बैंकको वित्तीय अवस्थामा थप सुधार ल्याउन बैंक व्यवस्थापन प्रतिबद्ध रहेको बताए ।