काठमाडौं । साताको पहिलो कारोबार दिन आइतवार नेप्से परिसुचक १७ दशमलव ३३ अंकले घटेर १ हजार ३९१ दशमलव ४६ विन्दुमा पुगेको छ । यस दिन १८५ ओटा कम्पनीको ४३ लाख ७१ हजार ८५४ कित्ता शेयरको रू. १ अर्ब २५ करोड बरावरको शेयर खरीदविक्री भएको हो । आइतवारको बजारमा विभिन्न कम्पनीहरुले प्रकाशित गरेका वित्तीय बिबरणहरुको प्रभाव परेको छ । चौथो त्रैमासमा अधिकांश कम्पनीको नाफा घटेकाले त्यसको असर शेयर बजारमा परेको हो ।

अघिल्लो कारोबार दिन नेप्से परिसुचक १ हजार ४०७ दशमलव ८६ विन्दुमा थियो । आइतवार सबैभन्दा बढी साधना लघुवित्त वित्तीय संस्थाको शेयर ९ दशमलव ९२ प्रतिशत वृद्धि भएको छ । उक्त कम्पनीको शेयर मूल्य प्रतिकित्ता रू. ६९८ पुगेको छ । सबैभन्दा बढी कारोबार नेपाल बैंकको भएको छ । नेपाल बैंकको शेयर कारोबार रू. ८ करोड १४ लाख बराबरकोको भएको छ ।

सबैभन्दा बढी कारोबार गर्ने दास्रो कम्पनीमा नेपाल पुनर्बीमा कम्पनीको भएको छ । आइतवार सबैभन्दा बढी आँखुखोल जलविद्युत् कम्पनीको शेयरधनीले गुमाएका छन् । यस दिन उक्त कम्पनीको शेयर मूल्य ७ दशमलव ४१ प्रतिशत घटेर रू. ५० पुगेको हो । यसैगरी दोस्रोमा नेपाल इन्भेष्टमेण्ट बैंकको संस्थापक शेयर घटेको छ ।

कारोबारमा आएका १२ ओटा समूहमध्ये व्यापार समूहको परिसुचक १ दशमलव ३२ प्रतिशत बढेको छ भने बाँकी समूहको परिसुचक घटेको छ । सबैभन्दा बढी उत्पादन तथा प्रशोधन समूहको परिसुचक २ दशमलव १४ प्रतिशत घटेको छ । आइतवार वित्तीय बिबरण प्रकाशित गरेका युनिलिभर नेपाल र बोटलर्स नेपालका दुई कम्पनीहरु चौथो त्रैमासमा नोक्सानीमा गएकाले शेयर मूल्य पनि घटेको छ ।

---