एनआइसी एसिया बैंक लिमिटेड र सुजुकी ब्रान्डका सवारीको नेपालका लागि आधिकारिक विक्रेता सिजी मोटोकर्प प्रालिबीच लगानी सम्झौता भएको छ । ग्राहकले सवारीसाधन गरिद गर्दा लगानीका लागि बैंकलाई फाइनान्सिङ पार्टनर बनाउने सम्झौता भएको हो ।

सम्झौताअनुसार सुजुकी ब्रान्डका चारपांग्रे सवारी बिक्री गर्दा बैंकले सिजी मोटोकर्पका ग्राहकलाई सवारी कर्जामा थप सहजता प्रदान गर्ने जनाइएको छ । बैंकले ल्याएको सुपर चामत्कारिक सवारी कर्जामा वार्षिक ८.२५ प्रतिशत ब्याजदर तथा ०.२५ प्रतिशत प्रशासनिक शुल्कका साथै अन्य सुविधा भएको कर्जामार्फत सुजुकी ब्रान्डका सवारी ग्राहकले खरिद गर्न सक्ने बैंकले जनाएको छ । यो सुविधा रातो प्लेटका निजी तथा व्यावसायिक प्रयोजनका लागि सवारी खरिद गर्न चाहने ग्राहकले लिन सक्ने जनाइएको छ ।

बैंकले ग्राहकलाई आवश्यक कागजात प्राप्त भएको ४८ घन्टाभित्रै कर्जा प्रवाह गर्ने व्यवस्था गरेको छ । सुपर चामत्कारिक सवारी कर्जाअन्तर्गत २ करोड रुपैयाँसम्मको रातो प्लेटका निजी तथा व्यवसायका लागि सवारी खरिद गर्न सकिने व्यवस्था रहेको बैंकले जनाएको छ । निजी प्रयोजनको सवारीका लागि ५० प्रतिशत तथा व्यावसायिक प्रयोजनका सवारीका लागि ८० प्रतिशत कर्जा प्रवाह गर्ने सम्झौता भएको जनाइएको छ ।

सवारीसाधन धितो राखेमा ८ वर्षसम्म र सवारी तथा रियल इस्टेट दुवै धितो राखेमा अधिकतम १५ वर्षसम्म कर्जा अवधि हुने व्यवस्था गरिएको बैंकले जनाएको छ । यो कर्जामा पहिलो वर्ष कर्जाको ब्याजदर परिवर्तन नहुने र एक वर्षपश्चात् बैंकले ८.२५ प्रतिशत वा बेसरेट ८.२५ प्रतिशतभन्दा बढी भएमा बेसरेटबराबर नै यस कर्जाको ब्याजदर कायम गर्ने व्यवस्था गरेको जनाएको छ ।

सम्झौतामा बैंकका सहायक प्रमुख कार्यकारी अधिकृत सन्तोषकुमार राठी तथा कम्पनीका महाप्रबन्धक (सेल्स एन्ड मार्केटिङ) सिरज पन्तले हस्ताक्षर गरेका थिए । बैंकले देशभरमा ३ सय २६ शाखा, ४ सय ६५ एटिएम, १ सय १ एक्सटेन्सन काउन्टर एवं ६४ शाखारहित बैंकिङमार्फत सेवा दिँदै आएको जनाएको छ ।