काठमाडौं । नेपाली धितोपत्र मापक नेप्से परिसूचक २१.६१ अंकले घटेर १३८२.२५ विन्दुमा अडिएको छ । १८६ कम्पनीको १ अर्ब २३ करोड रुपैयाँभन्दा बढीको कारोबार भएको छ । ३४ लाख ४७ हजार ७६५ कित्ता सेयर खरिदबिक्री भएको छ । यस दिन अजोड इन्सुरेन्स, आरम्भ चौतारी लघुवित्त र नेपाल फाइनान्सको भाउ सर्किट लाग्ने गरी बढेको छ ।

आँखुखोला जलविद्युत कम्पनीको भाउ सबैभन्दा धेरै ९.८४५ ले घटेको छ । यता, खरिदबिक्री रकममा नेपाल पुनर्बीमा कम्पनी अग्रस्थानमा छ । यसको १३ करोड ६१ लख रुपैयाँभन्दा बढीको कारोबार भएको छ । दोस्रोमा नेपाल लाइफ इन्सुरेन्स र तेस्रोमा एनएमबि बैंक परेका छन् । यतिबेला गत आर्थिक वर्षको वित्तीय विवरण आउने क्रम पनि सुरु भएको छ । यसकारण पनि लगानीकर्ता ‘पर्ख र हेर’ को अवस्थामा बसेको अनुमान गर्न सकिन्छ ।

निरन्तर घटेर भाउ सस्तो भएपछि फेरि कुनै पनि बेला बजार बाउन्स ब्याक हुन सक्ने विश्लेषणहरु भइरहेका छन् । तथापि, कहिले र कुन विन्दुबाट बजार फर्किन्छ भनेर ठोकुवा गर्न भने सकिंदैन । कोरोनाको दोस्रो लहर समुदाय तहमा विस्तार हुन थालेपछि लगानीकर्तामा मनोवैज्ञानिक त्रास बढेको अनुमान गरिएको छ । किन भने सेयर बजारमा सर्वसाधारण लगानीकर्ताको मनोविज्ञानको सर्वोपरि भूमिका रहने गर्छ । कोरोना त्रासका कारण यतिबेला कतिपय लगानीकर्ता ‘पर्ख र हेर’ को अवस्थामा बसेको अनुमान छ । तथापि, यसअघि बजार कोरोना त्रासकै बीचमा बढेको थियो ।