काठमाडौं । बुधवारको कारोबारमा शेयर बजार १ दशमलव ५१ अंक माथि उक्लिएर १ हजार ४२५ दशमलव ३२ विन्दुमा पुगेको छ । यस दिन १ हजार ४२५ दशमलव ४० विन्दुबाट खुला भएको बजार १ हजार ४२७ दशमलव १५ विन्दुसम्म पुगेको थियो भने १ हजार ४१३ दशमलव ४५ विन्दुसम्म झरेको थियो । यस दिन उतारचढाबका बीच अन्तिममा बढेर बजार बन्द भएको हो ।

अघिल्लो कारोबार दिन मंगलवार शेयर बजार ६ दशमल ६१ अंकले घटेर १ हजार ४२३ दशमलव ८१ विन्दुमा बन्द भएको थियो । यतिवेला बजारमा गत आवको चौथो त्रैमासको वित्तीय विवरणको सकारात्मक प्रभाव परिरहेको छ । यद्यपि कारोबारी लगानीकर्ताहरुले दुई दिनमै नाफा बुक गर्ने प्रबृत्तिले भने बजार प्रभावित हुने सम्भावना पनि देखिन्छ । बुधवारको न्यून अंकले बढेको बजारमा रू. ९५ करोड १९ लाख ६० हजार बरारबरको शेयर खरीदविक्री भएको छ । कारोबार रकम भने अघिल्लो कारोबार दिनको भन्दा कम भएको हो ।
अघिल्लो कारोबार दिन मंगलवार शेयर बजारमा १ अर्ब २७ करोड १७ लाख ३८ हजार बराबरको शेयर कारोबार भएको थियो ।

यस दिनको सर्वाधिक कारोबार गर्नेमा युनाइटेड इन्स्योरेन्स कम्पनी रहेको छ । उक्त कम्पनीको रू. ६ करोड २० लाख ७३ हजार बराबरको शेयर कारोबार भएको छ । लगातार सर्वाधिक कारोबार गरिरहेको नेपाल पुनर्बीमा कम्पनी पनि यस दिन दोस्रो नम्बरमा परेको छ । उक्त कम्पनीको रू. ६ करोड ३ लाख ८१ हजार बराबरको शेयर कारोबार भएको छ । यस दिन साधना लघुवित्तको ९ दशमलव ८९ प्रतिशत र घलेम्दी हाइड्रोको ९ दशमलव २६ प्रतिशत शेयरमूल्य बढेको छ । त्यस्तै युनियन हाइड्रोपावर लिमिटेडको ६ दशमलव ४५ प्रतिशत र आँखुखोला जलविद्युत् कम्पनीको ५ दशमलव ५६ प्रतिशतले शेयरमूल्य घटेको छ । बुधवार १८८ ओटा कम्पनीको २० हजार ७१९ पटकको कारोबारमा ३० लाख ३२ हजार ३११ कित्ता शेयर कारोबार भएको हो । यस दिन ठूला कम्पनीहरुको कारोबार मापक इन्डेक्स शून्य दशमलव शून्य २ प्रतिशत बढेर २९७ दशमलव २९ विन्दुमा पुगेको छ ।

कारोबारमा आएका १२ ओटा समूहमध्ये ६ ओटा समूहको परिसूचक बढेको छ भने ६ समूहको घटेको छ । यस दिन बैंकिङ समूहको शून्य दशमलव ३१ प्रतिशत, होटल समूहको शून्य दशमलव शून्य ५ प्रतिशत, निर्जीवन बीमा समूहको शून्य दशमलव ५८ प्रतिशत, उत्पादन तथा प्रशोधन समूहको शून्य दशमलव शून्य १ प्रतिशत, जीवन बीमा समूहको शून्य दशमलव शून्य ८ प्रतिशत र म्युचुअल फण्ड समूहको शून्य दशमलव ८८ प्रतिशत परिसूचक बढेको हो । त्यस्तै लघुवित्तको शून्य दशमलव २८ प्रतिशत, अन्यको शून्य दशमलव १९ प्रतिशत, वित्तको शून्य दशमलव ६६ प्रतिशत, जलविद्युतको शून्य दशमलव ३४ प्रतिशत, विकास बैंकको शून्य दशमलव ६ प्रतिशत र व्यापारिक समूहको शून्य दशमलव ५९ प्रतिशत परिसूचक घटेको छ ।