काठमाडौं । कोभिड–१९ कारण सरकारले अन्तः शुल्क इजाजतपत्र नवीकरणको म्याद दुई महिना थप गरेको छ । कोभिड–१९ का कारण असहज परिस्थिति उत्पन भएका कारण अर्थ मन्त्रालयअन्तर्गतको आन्तरिक राजस्व विभागले सो दुई महिना समय थप गरी असोजसम्म पुर्र्याएको हो । अन्तःशुल्क ऐन २०५८ को दफा ९ को उपदफा ५ बमोजिम अन्तःशुल्क इजाजतपत्र हरेक वर्ष साउन महिनाभित्र नवीकरण गरिसक्नु पर्ने व्यवस्था छ ।

अन्तःशुल्क ऐन २०५८ को व्यवस्थाअनुसार अन्तः शुल्क इजाजतपत्र साउनभित्र गरिसक्नु पर्ने कानुनी व्यवस्था भएपनि यस वर्ष विषम परिस्थिति भएका कारण  नवीकरणको समय असोज मसान्तसम्म थपिएको हो ।

आन्तरिक राजस्व विभागका प्रवक्ता मुक्ति पाण्डे हाल कोभिड–१९ का कारण सिर्जित असहज परिस्थितिमा उक्त अवधि २०७७ असोज मसान्तसम्म थप गरिएको बताए । ‘अन्तःशुल्क लाग्ने वस्तुको थोक तथा खुद्रा कारोबार गर्ने व्यवसायीलाई धेरै समस्या आउने हालको परिस्थितिलाई मध्येनजर गर्दै नवीकरण म्याद थप गरिएको हो, ’ उनले भने ‘ यस्तो इजाजतपत्र नवीकरण गर्नु पर्ने उत्पादनक तथा व्यवसायी एक लाखदेखि सवा लाखको हाराहारीमा छन् । 

अन्तःशुल्क लाग्ने वस्तुको खुद्रा कारोबार गर्नेको संख्या धेरै भएकाले उनीहरूलाई समस्या नपरोस् भनेर सहज अवस्था सिर्जना गर्न यस्तो व्यवस्था गरिएको हो । सरकारले गरेको यो व्यवस्थासहित व्यवसायीले  अबको दुई महिनासम्म कुनै दस्तुर तथा जरिवाना नतिरी इजाजपत्र नवीकरण गर्न सक्नेछन् । यसले अन्तःशुल्क लाग्ने वस्तु उत्पादन गर्दै आएका उद्यमी तथा बिक्री वितरण गर्दै आएका व्यवसायीलाई ढुक्क गराएको छ । अन्तस्शुल्कको इजाजत कर आन्तरिक राजस्व कार्यालय तथा करदाता सेवा कार्यालयबाट नवीकरण गर्न सकिन्छ ।