नेपालका करिब ८० प्रतिशत जनतामा वित्तीय पहुँच पुगेको  पुगेको छ । यस हिसाबले हेर्दा दक्षिण एशियामा वित्तीय पहुँचको हिसाबले नेपाल पहिलो नम्बरमा आउँछ ।

नेपाल राष्ट्र बैंकले वर्गीकरण गरेका क, ख र ग वर्गका वाणिज्य बैंक, विकास बैंक र वित्तीय संस्थाहरु २०७६ असार मसान्तसम्म नै  ६१ प्रतिशत जनताको पहुँचमा पुगेका छन्  । त्यसपछिको एक वर्षको अवधिमा झण्डै ५० लाख थप खाता खोलिएको नेपाल बैंकर्स संघका अध्यक्ष भुवनकुमार दाहाल बताउनुहुन्छ । उहाँका अनुसार यसमा  डी वर्गका वित्तीय संस्था र झण्डै ४० हजारको संख्यामा रहेका सहकारीहरुको सेवालाई गणना गरिएको छैन । देशका ७५३ स्थानीय तहमध्ये ७४७ वटामा वाणिज्य बैंकका शाखाहरु विस्तार भएका छन् र बाँकीमा पनि छिटै विस्तार हुने उहाँको भनाइ छ ।

२०७६ चैत मसान्तसम्म तीन करोड १९ लाख खाता सञ्चालनमा रहेको पाइन्छ । जबकी २०७६ असार मसान्तमा दुई करोड ७८ लाख खाता सञ्चालनमा रहेको थियो । सबैखालका वित्तीय संस्थाहरुको सेवालाई हेर्दा अहिले नै ८० प्रतिशत जनतामा वित्तीय पहुँच पुगेको भन्न सकिने अवस्था छ । २०७६ चैत मसान्तसम्म क, ख र ग वर्गका मात्रै पाँच हजार ६९४ शाखा सञ्चालनमा छन् । एउटा शाखाले पाँच हजारलाई मात्रै सेवा दिएको अवस्थामा पनि दुई करोड ८४ लाख ७० हजार जनताले बैंकिङ सेवा पाएको दाहालको भनाइ छ । यसैगरी गत चैत मसान्तसम्म निक्षेप र जिडिपीको अनुपात शत प्रतिशत छ भने कर्जा र जिडिपीको अनुपात ८६ प्रतिशत रहेको छ । यसरी दक्षिण एशियाका मुलुकहरुको तुलनामा नेपालको वित्तीय पहुँचको अवस्था राम्रो मात्र होइन धेरै नै राम्रो रहेको छ । 

–––